Ардчилсан Хувьсгалын 25 жилийн ойд зориулсан Орхон аймгийн ИТХ-ын хүндэтгэлийн хуралдаанд ИТХ-ын дарга Б. Мягмарсүрэнгийн хэлсэн үг

 ИЛТГЭГЧ НЬ: Аймгийн ИТХ-ын дарга Б.Мягмарсүрэн

         Эрхэм хүндэт төлөөлөгчид өө
         Урилгаар оролцож байгаа эрхэм зочидоо
 

   Ардчилсан хувьсгалын 25 жилийн ойд зориулан хуралдаж байгаа Аймгийн ИТХ-ын Хүндэтгэлийн хуралдаанд хүрэлцэн ирсэн Та бүхэнд болон Аймгийнхаа нийт иргэдэд Ардчилсан хувьсгалын 25 жилийн ойн баярын мэндийг өргөн дэвшүүлж, эрүүл энх, аз жаргал, ажлын амжилт, сайн сайхан бүхнийг хүсэн ерөөж мэндчилж байна. Монгол оронд 70 гаруй жил оршин тогтносон коммунист дэглэмийн хүлээсээс ард түмнээ чөлөөлж ардчилал, чөлөөт зах зээлийн нийгмийг бүтээн бий болгож өнөөдрийг хүртэл сахин хамгаалж ирсэн Ардчилалын анхдагч, партизанууд та  бүхэндээ ардчилалын төлөө зүрх сэтгэл нь цохилж явдаг бүх иргэдийнхээ өмнөөс мэхийн ёсолж байна.
Ардчилал монгол оронд монголын ард түмэнд тийм ч амар хялбар олдоогүй  юм. Цагаан морин жилийн өвлийн тэсгим хүйтэн, хаврын хахирган зэврүүн өдрүүдэд ардчилсан хувьсгалын уухай монгол орны өнцөг булан бүрт цуурайтан өөрийн амь нас эрүүл мэнд, алдаж болох бүх зүйлээрээ дэнчин тавьж тэмцсэн Ардчилсан хувьсгалын тэмцэгч болгоны шантрашгүй зориг, зүтгэлийн үр дүнд  “Ардчилал” монголын ард түмэнд  олдсон юмаа. Орхон аймаг Эрдэнэт хот бол өөрөө Ардчилалын өлгий хот юмаа.
Тэртээ 1989 оны 12 сарын 03 ны өдөр Ардчилал, тусгаар тогтнол, хүний эрх, эрх чөлөөний төлөө тэмцэхээр сэтгэл шулуудсан хэсэг нөхөд маань Ардчилсан хувьсгалын тэмцлийн нэгэн илэрхийлэл болсон “Битүү” жагсаалыг   зохион байгуулж Монгол улсын түүхэнд Ардчилалын төлөөх тэмцлийн анхны хэтийг цахиж явсан нь яах аргагүй Ардчилалын түүхэнд тэмдэглэгдэн үлдэх түүхэн үнэн билээ. Хаалттай нийгмийн  үед ийм алхам хийх нь  байтугай бодож санах төдийд л хүний хувь тавилан буруугаар эргэж мэдэх тийм л хүнд цаг үе байсан юмаа. Тухайн үеийн  нам төр , цагдаа сэргийлэх, НАХЯ-ны хяналтан дор ямархан эр зориг гаргаж битүүхэн айдастай алхалж явсан болоо гэж өнөөдөр бодоход бидэнд бахархах сэтгэл өөрийн эрхгүй төрж байдаг юмаа. Тийм ч  учраас 2012 оны орон нутгийн сонгуулийн үр дүнгээр байгуулагдсан Аймгийн иргэдийн Төлөөлөгчдийн хурал  Эрдэнэт хотод Ардчилсан хувьсгалын анхны тэмцлийн гал бадарч байсныг баталгаажуулах, түүхэнд тэмдэглүүлэх, Ардчилалын анхны жагсаал өрнөсөн төв гудамжаа “Эрх чөлөөний өргөн чөлөө” болгох ,Ардчилсан хувьсгалын 25 жилийн ойг тохиолдуулан МоАХ-ны нэр бүхий анхдагч гишүүдийг  аймгийнхаа “Хүндэт иргэн” болгох түүхэн шийдвэрүүдийг гаргаж өнөөдөр  Ардчилсан хувьсгалын 25 жилийн ойд зориулсан аймгийн ИТХ-ын хүндэтгэлийн чуулган хуралдуулж байгаа нь Аймаг Орон нутгийн зүгээс Ардчиллагчиддаа хүндэтгэл үзүүлж байгаа томоохон үйл явдал юм.  Ардчилсан хувьсгалын   үр дүнгээр өдрөөс өдөрт цэцэглэн хөгжиж байгаа Эрдэнэт хотод ажиллаж, амьдарч байгаагаараа  бид бүгд бахархах  бахдах ёстой юм. Ардчиллын өлгий Эрдэнэтийнхэний Монголын Ардчилалд оруулсан  хувь нэмрийг 25 жилийнхээ босгон дээр баталгаажуулж чадлаа.
Ардчилсан хувьсгалын анхны жилүүдэд Монгол улс коммуннист тоталитор нийгмийн байгууллаас Ардчилсан чөлөөт зах зээлийн эдийн засгийн тогтолцоонд шилжих хүнд үеүүдийг Монголын ард түмэн хамтаараа туулан гарч чадсан юм. Энэ бүгд нь Ардчилсан хувьсгалын удирдагчид Монголын төлөө сэтгэл зүрх нь цохилж байсан үе үеийн тэмцэгчдийн хичээл зүтгэлийн үр дүн байлаа. Монголчууд Ардчилалыг сонгож Ардчилсан Монгол улсаа дахин тунхагласаны үр дүнд хүний эрх, эрх чөлөө баталгаажиж, хувийн өмчтэй болох тэр бүхий л эрхийг нь нээж, баталгаажуулж өгсөнийг нь мартаж болохгүй билээ. Өнгөрсөн түүхийг сөхөн харвал хэлмэгдүүлэлтийн хар  шуурга Монгол орныг нөмөрч нэг хүнийг тахин шүтэж, нэг намын дарангуйлал ноёлж, хувийн өмчийг хураан авч, хэлмэгдүүлэн зовоож хувь хүний заяагдмал эрх, эрх чөлөөг хаан боогдуулж үг хэлэх, хэвлэн нийтлэх бүхий л эрхийг хяхан хавчиж байсан тэр хүнд хэцүү нийгмийг гагцхүү Ардчилалын салхи сэвэлзэн үлээж өнөөдрийн эрх чөлөөт нийгмийг цогцлоон байгуулах эхлэлийг тавьсан билээ. Ардчилал тасралтгүй хөгжсөөр байх ёстой. Ардчилсан хувьсгалын үр дүнд Монгол улс, Улс Төр нийгмийн байгууллынхаа хувьд олон намын тогтолцоонд шилжиж Ардчилсан олон ишт үзлийг шингээсэн  Үндсэн хуулиа баталж олон намын төлөөлөл бүхий Ардчилсан Парламентат  засаглалтай улс орон болж хөгжиж байна. 
Өнөөдөр 12 дугаар сарын 10-ны өдөр. Олон Улсын хүний эрхийг хамгаалах  өдөр.Одоогоос   25 жилийн тэртээх энэ өдрүүдэд  Монгол оронд Ардчилсан хувьсгалын гал  бадарч, нийгмийг бүхэлд нь өөрчлөн цогцлоох хүчит салхи хуйларч эхэлсэн түүхтэй.
Ийнхүү цагаан морин жил эхлүүлсэн Ардчилсан хувьсгал эрийн цээнд хүрч, Ардчилсан Монгол улс 25 дахь  жилдээ энэхүү түүхэн ойн  баярын өдрөө тэмдэглэж  байна.
Монгол улсад өрнөсөн ардчилсан хувьсгалын үр дүнд Монгол улс хүн төрөлхтний хөгжлийн жам ёсны гольдрилд буюу ардчилал, зах зээлийн харилцаанд эргэлт буцалтгүй шилжин орсон нь манай улсын хөгжил дэвшилд өргөн дардан замыг нээсэн юм. Монгол улс 1992 онд шилжин орж буй нийгмийнхээ агуулга мөн чанарт нийцсэн, цаашдын хөгжлийн чиг хандлагыг баталгаажуулсан шинэ үндсэн хуулийг баталж, эрх зүйн үндсийг тодорхойлж авсан түүхтэй.
Ардчилал гэдэг нэр томъёо хэлэгдэх, яригдах тухай бүр хүний эрхийн асуудал 

хамтдаа ойлгогдож яригдаж байдаг жамтай. Аливаа улсын ардчилсан улс мөн эсэхийг нь  тухайн улс Үндсэн хуулиараа хүний эрх, эрх чөлөөг хэрхэн  баталгаажуулсан, хуульчилснаар хэмждэг ёстой . 1992 онд батлагдсан Монгол улсын шинэ үндсэн хуулийн  оршил  хэсэгт “ Эх орондоо хүмүүнлэг, иргэний ардчилсан нийгэм цогцлуулан хөгжүүлэхийг эрхэм зорилгынхоо нэг болгож, Ардчилсан ёсыг төрийн үйл ажиллагааны үндсэн зарчим хэмээн хуульчлаж, Монгол улсын үндсэн хуулийн 16 дугаар зүйлд Монгол улсын иргэн баталгаатай эдлэх 18 багц эрх, эрх чөлөөг хуульчилан баталгаажуулж, төрөөс хүний эрх, эрх чөлөөг хангахуйц эдийн засаг, нийгэм, хууль эрх зүйн болон бусад баталгааг бүрдүүлж, хүний эрх, эрх чөлөөг зөрчихтэй тэмцэх, хөндөгдсөн эрхийг сэргээн эдлүүлэх үүргийг иргэнийхээ өмнө хариуцахаар баталгаажуулсан нь Ардчилалын томоохон ололтын илэрхийлэл юм.
Ардчилсан хувьсгалын үр дүнд Монгол оронд олон намын тогтолцоо бүрдэж, Монгол хүн өмчийнхөө жинхэнэ эзэн нь болж, орон нутагтаа өөрсдийн сонгосон төлөөлөгчөөрөө дамжуулан болон өөрсдөө шууд нутаг дэвсгэрийнхээ амьдрал эдийн засаг, нийгмийн хөгжлийн асуудлыг бие даан шийдвэрлэдэг болж, үг хэлэх, хэвлэн нийтлэх, үзэл бодлоо чөлөөтэй илэрхийлэх зэрэг өргөн эрх, эрх чөлөөг баталгаатай эдлэх болсон юм.
Ардчилсан хувьсгалын түүхэн 25 жилийн хугацаанд Орхон аймгийн НӨУБ 6 дахь удаагийн Бүрэн эрхийнхээ хугацааг туулж, аймаг орон нутгийнхаа эдийн засаг, нийгмийн цогц, тэнцвэрт хөгжлийг удирдлага зохион байгуулалтын талаар хангаж ажиллаж байна. . Аймаг төсөв санхүүгийн хувьд бие даан өөрөө өөрийгөө санхүүжүүлэх зарчмыг тууштай хэрэгжүүлж, газар, өмчийн харилцаанд гарсан өөрчлөлтийг харгалзан Эрдэнэт хотын ерөнхий төлөвлөгөөг шинэчлэн баталж хот байгуулалтын хөгжлийг хангах болон аймаг, орон нутаг,  иргэдийнхээ нийгэм, эдийн засаг, хөгжлийн олон арван томоохон бодлогын баримт бичгүүдийг батлан хэрэгжүүлж байна.
Ардчилал, эрх чөлөө, тусгаар тогтнол бол олж авахад туйлын хүнд, үнэ цэнэтэй ямагт сахин хамгаалж байх ёстой ард иргэдийн маань эрх ашиг, нэгдмэл хүсэл зорилгын илэрхийлэл юм. Тусгаар тогтнол, эрх чөлөө, шудрага ёс, эв нэгдэл, эрхэм ёсыг дээдлэх нь  Монгол түмний уламжлалт бахархал билээ. Монголын ард түмэнд Ардчилал, тусгаар тогтнол, хүний эрх, эрх чөлөөг тэмцэн олж ирсэн Ардчилсан хувьсгалын анхдагчид, үе үеийн тэмцэгчдийн ариун үйлс Улс орон, аймаг орон нутаг, Ардчиллын түүхэнд өнө мөнхөд тэмдэглэгдэн  үлдэх болно.
МоАХ-нь Монголын ардчиллын зохиогч нь байсан нь түүхийн үнэн учраас өнөөдөр ч, ирээдүйд ч Ардчиллыг сахин хамгаалагч  нь байна гэдэгт эргэлзээгүй итгэж байна. Ардчиллын амжилт бүтээлийн буухиа тасралтүй үргэлжлэх болтугай.
Орхон аймгийнхаа нийт иргэд, зочид төлөөлөгчид МоАХ-ны анхдагчид, партизанууд, гишүүд дэмжигчидээ
25 жилийн өмнө “Хонхны дуугаар” эхэлсэн Ардчилсан хувьсгалын үйл хэрэг Ардчиллын  10 цагаан буян айл өрх, иргэн бүрт аз жаргал, аз хийморь, ажил хөдөлмөрийн амжилт бүтээл болон очих болтугай.
                                      Монголын Ардчилал үеийн үед мандан бадарч байх болтугай
                                         Төрийн нуруу түвшин, түмэн олон амгалан байх болтугай.
 

 

Сэтгэгдэл


Сэтгэгдэл

Мэдэгдэл. Энд сэтгэгдэл байхгүй!

Холбоотой мэдээлэл

2015-05-09 2311
Найрамдлын хотод ялалтын хөшөө сүндэрлэлээ

Эх орны дайны ялалтын 70 жилийн ойн баярын энэ өдөр Монгол Оросын найрамдлын бэлгэ тэмдэг болсон Эрдэнэт ...

2015-04-20 1299
ГХБХБГ-ын 7 хоногийн ажлын мэдээ /2015.04.13-17/

• Бусад орон нутагт газар өмчлөх хүсэлтэй 4 иргэнд газар өмчлөөгүй лавлагаа гаргаж өгөөд байна. • ...

2014-04-09 9872
Рашаант баг хоггүй өрх, хоггүй баг уриалга гарган ажиллаж байна

Рашаант баг хоггүй өрх, хоггүй баг уриалга гарган багтаа хогны менежментийг сайжруулах хөтөлбөр гарган ...

Цахим төрийн үйлчилгээ


Сурталчилгаа

 

 

 

 

Веб статистик

Таны IP хаяг: 18.232.146.112
2017-11-30-ний өдрөөс хойш.
  • 21 Онлайн
  • 2371 Өнөөдөр
  • 2150 Өчигдөр
  • 2371 Долоо хоногт
  • 83963 Сүүлийн сард
  • 2834861 Нийт хандалт

Санал асуулга

Манай вэб сайт таны санаанд хэр нийцэж байна?
Нийт саналын тоо:  790

Facebook

Цаг агаар