УИХ-ын гишүүн, Орхон аймгийн Ардчилсан намын дарга М.Батчимэг, Аймгийн ИТХ-ын дарга Б.Мягмарсүрэн, ОХУ-аас Орхон аймагт суух Ерөнхий консул Ракшаев Рыгзын Ракшаевич болон албаны бусад хүмүүс өнөөдөр Улан-Үдэ хотын нэрэмжит гудамжинд мод тарилаа.

 

ОХУ-ын Эрдэнэт хот дахь Ерөнхий консулын газрын дэргэдэх энэ гудамжийг Дэлхийн II дайны ялалтын 70 жилийн ойд зориулж тохижуулах ажил хийгдэж байгаа бөгөөд Ялалтын баярын 70 жилийн ойд зориулсан гэрэлт хөшөө уг гудамжинд сүндэрлэж 5 сарын 9-нд нээлтийг нь хийсэн бол ногоон төгөл байгуулах ажил өнөөдрөөс эхэлж байна.

 

Улан-Үдэ хотын нэрэмжит гудамжинд 2900 м² талбайд 120 гаруй Голт бор хэмээх гоёлын модыг тарина. Голт бор нь Цэцэрлэгт хүрээлэн, ойн зурвас төгөл зэргийг байгуулахад тохиромжтой, хотын өнгө үзэмжийг нэмэх гоёлын мод юм.

 

Мод тарих ажилд Аймгийн ИТХ-ын тэргүүлэгч Д.Доржпүрэв, Хотын захирагчийн албаны дарга Б.Батжаргал, Аймгийн Ерөнхий аудитор Д.Цогбадрах, Аймгийн ЗДТГ-ын цэргийн штабын дарга, Хурандаа Г.Батсуурь,  Монгол, Оросын найрамдлын нийгэмлэгийн Орхон аймаг дахь салбарын тэргүүн Б.Мажинбуу болон Консулын газрын хамт олон оролцож хотынхоо өнгө үзэмжийг нэмэх үйлсэд хувь нэмэр орууллаа.