Сэтгэлийн зул


     Тэр дуугүйхэн л мишилз-дэгсэн. Юм хэлсэн ч дуугүйхэн л инээмсэглэнэ. Хэлээгүй ч дуугүйхэн л инээмсэглэнэ. Нүднийхээ шилийг нэг гараараа авч нөгөө гараараа донжтойхон гэгч нь арчиж байгаад л хараг гэсэн шиг нүдээрээ үл мэдэг ёжтойхон мишилзэн инээмсэглэнэ. Одоо бодох нээ бурхан л ингэж намуухан зөөлөн мишээж алив бүхэнд гүн утга нэвчсэн нандин сайхан хариу барьдаг юм шиг санагдана. Бид ч ийм нандин сайхан хариуг өдөр болгон өгөөмөр тэнүүн хүртсээр байгаад энэ хорвоо угаасаа л ийм байсан, байх ч ёстой юм шиг ээнэгшин дасчихсан ажээ. Тэгтэл  дуугүйхэн инээмсэглэлээр нь дутсан юм шиг Бурхан түүнийг маань аваад явчихжээ. Диваажинд ийм нэг нандин сайхан аальтан дутсан юм байлгүй дээ. 

     Намуухан зөөлөн мишээлтийнх цаана тийм нэг чигтээ зан байв. Хэлье гэснээ хэлчихнэ. Хэлэх дээрээ тулбал хэнээс ч дөлөхгүй эгцлэн харж байгаад хэлнэ. Шударга хүн гэж гаднаа гал дүрэлзүүлж, утаа май тавьсан хүнийг хэлдэггүй юм гэдгийг зөөлөн инээмсэглэл нь хэлээд өгнө. Хийе гэснээ  хийчихнэ. Хэний ч шахаа үглээгүйгээр хийнэ. Тэгэхдээ ном журмынх нь дагуу л хийнэ. Хийдэг хүн гэж  авч давхидаг морь шиг хамаа намаагүй хүнийг хэлдэггүй юм гэдгийг мөнөөх  намуухан мишээлээрээ  харуулна.

    Ааш зан, ажил төрөл нь намуухан урсах талын гол шиг л өөрөө үелзээд байна. Ажил гэж толгойтой үснээс их гээд хий хоосон цамнахгүй. Захаас нь цэгцтэй, барьцтай, амар тайван хэрнээ агдаж тэвдэлгүй хийгээд сурчихсан тул ямар ч нарийн төвөгтэй  ажилд самгардана гэж байхгүй. Дуугүйхэн инээмсэглээд л явж байна. Ажлыг мэднэ үү гэхээс, ажилд мэдүүлнэ гэж үгүй. Өөрөө ч их амгалан талдаа хүн. Энэхүү төрмөл гэхээсээ сурмал налгар зангийнх нь ард өөртөө итгэх итгэл тун хүчтэй лугшиж буй  нь мэдрэгдэнэ.

    Боловсорсон, тэр хэрээрээ боловсролын бодлого, зохицуулалт хариуцсан түшмэлийнх нь ажил гарт нь орчихсон хүмүүн байв. Цаашдаа улам, улам боловсрох ёстой гэдгийг итгэл үнэмшлийн төвшинд зорилгоо болгосныг хэлсэн  үг, хийсэн  ажил нь шаг хийтэл хэлээд өгнө . Тэрбээр зөөлөн инээмсэглээд л явж байвал хийсэн, хийж байгаа, хийх ажилд нь итгэж болноо л гэсэн үг. Тэрбээр  үнэхээр бидний итгэлийг хүлээсэн хүмүүн байсан юм. Түүнд ямар ч хэцүү ажил даалгасан хийж чадна, ямар ч хатуу үг хэлсэн дааж чадна гэдэг далд итгэл  бидэнд байсныг  үргэлж зөөлөн инээмсэглэл сэвшээж явдаг тэр маань орон зайгаа орхиод явахуй цагт сая  мэдрэхүй ажээ.  Үүнийг орчлонгийн гаслан гэхээс өөрөөр яалтай билээ.

      Хэлэх үг үл олдох, урсах нулимс эс эгших тийм өдөр бас тохиодог байжээ. Уйлснаас бүү асуу, инээснээс асуу гэж үг бий. Хайрт охин, энэрэлт ээж, халамжит хань, журамт нөхөр, төрийн төвшин албан хаагч Гонгоржавын Уянга танаас хэзээ ч яагаад инээв гэж асуух шалтгаан гарч байсангүй ээ. Тэрбээр  хүнийг алсуураа энэрч, аав ээж, үр хүүхэд, хань ижил, анд нөхдөө баясгах гэж инээдэг байсан учраас тэр бизээ.

       Бүхнийг инээмсэглэлдээ хураангуйлах бурханлаг  ухааныг тань биширч явъя. Бодвол юугаар ч дутдаггүй гэх бурхны оронд нандин чанар бүхэн шингэсэн намуухан инээмсэглэл дутсан юм байлгүй дээ.

     Тэрбээр  ээлжийн амралтаа л авлаа гэж хэлснээс  биш бурхны орон руу буцалтгүй одохоо хэлэлгүй дуугүйхэн яваад өгнө гэж яахин бид чинь мэдэх билээ. Уянга та минь биднийхээ сэтгэлд зөөлхөн мишээлээрээ УЯНГАЛАН үлджээ.

                                                       УМ САЙН АМГАЛАН БОЛОХ БОЛТУГАЙ.

 

Сэтгэгдэл


Сэтгэгдэл

8

um sain amgalan boltugai

Огноо:2015.08.19

Иргэн

Ум сайн амгалан болтугай

Огноо:2015.08.18

Холбоотой мэдээлэл

2015-02-09 737
Иргэдийн санал хүсэлтийг хүлээн авах 70353511 төвийн 7 хоногийн мэдээлэл /2015.02.02-06/

Шийдвэрлэж хариу өгсөн -39 Шийдвэрлэх шатандаа байгаа -25

2015-09-18 1967
“ХҮҮХДИЙН ХАРАА ХАМГААЛАХ СҮЛЖЭЭ” ТӨСӨЛ ОРХОН АЙМАГТ ХЭРЭГЖИЖ БАЙНА.

Эх хүүхдийн эрүүл мэндийн үндэсний төв нь 2014-2018 оны хооронд Орбис олон улсын байгууллагатай хамтран ...

2015-03-16 905
ОРХОН АЙМГИЙН УЛСЫН БҮРТГЭЛИЙН ХЭЛТСИЙН ДОЛОО ХОНОГИЙН МЭДЭЭ /2015.03.09-13/

Гадаад паспорт бүртгэлийн чиглэлээр: Гадаад паспортын сунгалт 48-ийг хийж эздэд нь гадаад паспорт ...

Сурталчилгаа

 

 

 

Веб статистик

Таны IP хаяг: 3.235.65.91
2017-11-30-ний өдрөөс хойш.
  • 9 Онлайн
  • 938 Өнөөдөр
  • 1626 Өчигдөр
  • 29212 Долоо хоногт
  • 138410 Сүүлийн сард
  • 2205197 Нийт хандалт

Санал асуулга

Манай вэб сайт таны санаанд хэр нийцэж байна?
Нийт саналын тоо:  754

Facebook

Цаг агаар