Энэ сарын 21,22-нд болох “Хангинахуйн шугуйн шагайн тойром” соёл урлагийн арга хэмжээний талаар мэдээлэл өглөө
Булган, Орхон аймаг хамтарсан хэвлэлийн бага хурал зохион байгуулж энэ сарын 21, 22-нд болох “Хангинахуйн шугуйн шагайн тойром” соёл урлагийн арга хэмжээний талаар сэтгүүлчдэд мэдээлэл өглөө.
Орхон аймаг Булган аймаг 2020-2024 онд хамтран ажиллах гэрээ байгуулж 14 чиглэлээр 71 арга хэмжээ хэрэгжүүлэхээр болсон байдаг. Тус хамтын ажиллагааны гэрээнд аялал жуулчлалыг бүсчлэн хөгжүүлэхтэй холбоотой зүйл заалтууд тусгагдсан бөгөөд хамтын ажиллагааны хүрээнд “Хангинахын шугуйн шагайн тойром” соёл урлагийн арга хэмжээг хамтран зохион байгуулахаар бэлтгэж байгаа талаар мэдээлэл хийлээ.
400 гаруй жилийн түүхтэй тус шагайн тойром нь сүүлийн 7 жил Булган аймгийн Хутаг-Өндөр сумын Хантай багийн Хангинахын шугуй хэмээх газар болж байгаа ажээ. Монос цэцэглэх цагаар болдог онцлогтой уг тойромд энэ жил үндэсний бөхийн барилдаан, хоёр аймгийн урлаг соёлын байгууллагын хамтарсан тоглолт, үдшийн цэнгүүн зэрэг олон арга хэмжээ болох юм.
Шагайн тойромд чансаа өндөртэй бүхий л шагай харваачид оролцдог бөгөөд улсын наадмын шагайн харваан дараа орох томоохон арга хэмжээ болдог гэдгийг хэлж байлаа.
Энэ жилийн хувьд шагайн тойрмоос гадна 128 бөхийн барилдаан болно. Үүнийг Орхон аймгийн Засаг даргын Тамгын газар зохион байгуулж байгаа юм. Барилдааны бүртгэл Хангинахын шугуйн шагайн тойром болох газарт 21-ний өглөө 09:00-11:00 цагийн хооронд болно. Арга хэмжээ болох газар нь Орхон аймгаас 115 километр, Булган аймгийн төвөөс 175 километрт Эгийн голын эрэгт оршдог. Иймд тус соёл урлагийн арга хэмжээг үзэж сонирхохоор ирсэн иргэд хувийн бэлтгэлээ хангаж ирэхийг зохион байгуулагчдын зүгээс анхааруулж байлаа.
Мөн тус газарт Цагдаагийн газар, Онцгой байдлын газрын эргүүл, хамгаалалтын баг ажиллана. Түүнчлэн хоол үйлчилгээний газрууд үйлчилгээ үзүүлж, аймгуудын брэнд бүтээгдэхүүний үзэсгэлэн гарах бөгөөд иргэд, жуулчид амарч тухлах бүхий л боломжийг хангасан байгаа ажээ.
Мэдээллийн төв
