Улаанбаатар дахь АНУ-ын Элчин сайдын яамны Дэд тэргүүн Мэйтью Фэрэнс тэргүүтэй бусад албаны хүмүүсийг хүлээн авч уулзлаа. 

Ноён Мэйтью Фэрэнс 2022 оны наймдугаар сараас хойш Улаанбаатар дахь АНУ-ын Элчин сайдын яамны Дэд тэргүүнээр томилогдон ажиллаж байгаа юм. 

Маргааш манай аймаг орон нутгийн төсвийн хөрөнгө оруулалтаар боссон томоохон бүтээн байгуулалт болох “Номын өргөө”-гөө нээнэ.

Энэ үеэр АНУ-ын Соёл мэдээллийн төв  Номын өргөө-нд үйл ажиллагаагаа албан ёсоор эхлүүлэх юм. Энэхүү арга хэмжээнд оролцохоор ноён Мэйтью Фэрэнс албаны хүмүүсийнхээ хамтаар манай аймагт зочилж байна.

Одоогоос 2 жилийн өмнө 2022 онд АНУ-ын ЭСЯ-ны ОНХА-ны Жон Браун, Элчин сайд Ричард Буанган нар манай аймагт айлчлах үедээ аймгийн Засаг дарга асан С.Батжаргалтай Номын төвд Америкийн соёл мэдээллийн төвийг нээх асуудлыг анх хөндөж, ажил хэрэг болгох талаар ярилцаж байсан нь ийн биелэлээ олж байгаа туйлын баяртай байгаагаа илэрхийллээ. 

Манай аймагт АНУ-ын Соёл мэдээллийн төв нээгдэнэ гэдэг Эрдэнэт хотын хүүхэд, залуучууд тухайн орны соёлтой танилцах, хэлний мэдлэгээ дээшлүүлэх гээд олон талын  боломж  бий болж байна.

Мөн АНУ-ын тусламжаар манай аймагт хэрэгжиж байгаа төсөл, хөтөлбөрүүдийн хэрэгжилт, үр дүн, явцын талаар санал солилцлоо. 

Тухайлбал, тус улсын санхүүжилтээр  2019 оноос Эрдэнэт хотын үерийн далан инженерийн байгууламж шинэчлэх, гэр хорооллын усан хангамжийг сайжруулах “Эрдэнэт хотын гамшигт тэсвэртэй байдал” төсөл нь Европын холбоо, Европын сэргээн босголт, хөгжлийн банкны 14 сая ам.долларын санхүүжилтээр хэрэгжиж байна. Санхүүжилтийн 7 сая ам.доллар нь буцалтгүй тусламж, 7 сая ам.доллар нь хөнгөлөлттэй зээл юм.

АНУ-ын Олон улсын хөгжлийн агентлагийн санхүүжилтээр Бизнесийн Тогтвортой Хөгжлийг сайжруулах, Ил Тод Байдлыг Нэмэгдүүлэх BEST хөтөлбөрийг Орхон аймагт Хөгжлийн шийдэл ТББ хэрэгжүүлж байна. Төсөл 2020-2025 онд хэрэгжиж байна. Тус төсөл нь ЖДБ-ийн санхүүжилт авах боломжийг нэмэгдүүлэх, ЖДБ-ийн засаглалыг сайжруулах, ЖДБ-ийн үйл ажиллагааг дэмждэг төрийн болон төрийн бус байгууллагуудын ил тод байдлыг хангах, хяналтын тогтолцоог бэхжүүлэх зорилготойгоор хэрэгжүүлж байна.

- АНУ-ын Олон улсын хөгжлийн агентлагийн санхүүжилттэй “Гамшигт тэсвэртэй орон нутаг” төслийг “Дэлхийн Зөн-Монгол” олон улсын байгууллага, Орхон аймгийн Онцгой байдлын газар хамтран хэрэгжүүлсэн. Тус төсөл нь иргэдийн амьжиргааг хамгаалах, мал аж ахуйн салбарт гамшгийн эрсдэлийг бууруулах, даван туулах чадавхийг бэхжүүлэх замаар орон нутагт тохиолдож болзошгүй гамшгийн эрсдлийг үе шаттайгаар бууруулах зорилготойгоор 2020-2022 онд гэр хорооллын Баянцагаан, Баянбулаг, Булаг, Дэнж, Их залуу, Шанд  багуудад хэрэгжүүлсэн. Төслтийн хүрээнд “Бэлэн бай” сургагч багшийн хөтөлбөр, “Эрсдэлгүй өрх-аюулгүй хөрш” аян зохион байгуулж, гамшгийн эрсдлийг бууруулах 6 бичил төсөл хэрэгжүүлсэн. Мөн 6 багт олон нийтийн оролцоотой гамшгийн эрсдлийн ерөнхий үнэлгээг ОБГ-тай хамтран хийсэн.

Мэдээллийн төв