Жаргалант сумын найман байршилд байх 162 дурсгалыг орон нутгийн хамгаалалтад авлаа
Аймгийн ИТХ-ын ээлжит 19 дүгээр хуралдаан хуралдаж байна. Хуралдаанаар түүх, соёлын үл хөдлөх дурсгалыг орон нутгийн хамгаалалтад авах тухай асуудлыг хэлэлцлээ.
Тодруулбал, Жаргалант сумын нутаг дэвсгэрт орших Дулаан уул, Дуулгат уул, Дэл хад, Уртын ам, Чингэлийн гол, Панзын далиу, Тугалч, Богино сайр гэх 8 байршилд байх 162 дурсгалыг сумын хамгаалалтад авах тухай асуудлыг Соёлийн өвийг хамгаалах тухай хуулийн хүрээнд хэлэлцүүлэв.
2022 онд аймгийн хэмжээнд зохион байгуулсан “Түүх дурсгалын үл хөдлөх дурсгалын улсын тооллого”-оор аймгийн нутаг дэвсгэрт байрлах 53 дурсгалт газрын 369 дурсгал, булш, хиргисүүр, зэл чулуу, тахилын онгонуудыг тоолж бүртгэсэн. Энэ тооллогоор Жаргалант суманд 18 дурсгалт газрын 295 дурсгалыг хамруулсан. Ингэхдээ хүрэл ба төмрийн үе, Хүннү, Сяньби, Түрэгийн үе зэрэг он тоололд хамаарах булш, хиргисүүр 162 байгааг тодорхойлсон байдаг.
Тиймээс орон нутгийн хамгаалалтад авч, судалгаа шинжилгээ хийх зайлшгүй шаардлагатай гэж үзэв. Аймгийн Засаг даргын үйл ажиллагааны хөтөлбөрт тусгагдсаны дагуу энэ онд орон нутгийн төсөвт 30 сая төгрөгийг Айрагийн гозгорын бүлэг дурсгалын малтлага, судалгааны ажилд баталсан. Малтлага, судалгааны ажлыг ирэх зургадугаар сард эхлүүлэхээр төлөвлөжээ.
Соёлын биет болон биет бус өв, түүх соёлын үл хөдлөх дусргалыг хамгаалах чиглэлээр Жаргалант, Баян-Өндөр сумын 20 өрхтэй гэрээ байгуулж, аймгийн нутаг дэвсгэрт байрлах 368 түүх, дурсгалын хамгаалалтыг хариуцуулж буй. Эдгээр өрхүүдийн урамшууллыг жил бүрийн орон нутгийн төсөвт тусган шийдвэрлэж байна.
Мэдээллийн төв
