Арван жилд нэг удаа зохион байгуулдаг “Хөдөө аж ахуй тооллого-2022” энэ сарын 21-нд Орхон аймгаас эхэлнэ

Статистикийн тухай хуулийн 7 дугаар зүйлд заасны дагуу Засгийн газрын 2022 оны 74 дүгээр тогтоолоор Хөдөө аж ахуйн ээлжит тооллогыг улсын хэмжээнд 2022 оны тавдугаар сараас долоодугаар сар хүртэл зохион байгуулах бэлтгэл ажлыг хангаж байна. Өнөөдөр Засаг даргын орлогч А.Түвшинжаргалаар ахлуулсан ажлын хэсэг хуралдаж зохион байгуулалтын талаар санал солилцлоо.
Тооллогын мэдээлэл, цуглуулалтын ажлыг зохион байгуулахдаа аймаг, нийслэлийг гурван бүс болгон хувааж, гурван өөр хугацаанд хийхээр төлөвлөөд байна. Орхон, Булган аймгийг нэгдүгээр бүс болгож, энэ сарын 21-нээс ирэх сарын 3 хүртэл тооллогын ажлыг зохион байгуулах юм.Тодруулбал, Баян-Өндөр суманд 4 тоологч, Жаргалант суманд 5 тоологч 14 хоногийн хугацаанд мэдээлэл цуглуулна.

“Хөдөө аж ахуйн ээлжит тооллого 2022”-т мал аж ахуй, газар тариалан, ой, загас, ан агнуурын чиглэлээр үйл ажиллагаа эрхэлдэг иргэн, аж ахуйн нэгж байгууллагыг түүврийн аргаар сонгож тооллогод хамруулна.

10 жилд нэг удаа зохион байгуулдаг уг тооллогын үр дүнд хөдөө аж ахуйн салбарын үйлдвэрлэлт, бүтцэд гарч байгаа өөрчлөлтийг тооцож, байгууллага бүрээр бүртгэж, ажиллах хүчний судалгаа гаргах, газар ашиглалт, хөрсний доройтол, ургацын хорогдол, бордоо, ургамал хамгааллын бодисын хэрэглээ, хүнсний хангамж, аюулгүй байдлын талаарх дэлгэрэнгүй статистикийн мэдээлэлтэй болох юм. Түүнчлэн хөдөө аж ахуйн салбарын үндсэн үзүүлэлтүүдээс гадна хөдөөгийн хөгжил, байгаль орчин, ус, газар ашиглалт, цөлжилт, загас, ойн аж ахуйн талаарх мэдээлэл, хөдөө аж ахуйн үйл ажиллагаа эрхэлж буй өрхийн үйлдвэрлэл, орлого, зардал, хүнсний хомстол, хангамж, санхүү, мал эмнэлгийн үйлчилгээ зэрэг бусад нэмэлт мэдээллийг цуглуулах боломж бүрдэхээс гадна аймгийн иргэдийг эрүүл чанартай хүнсээр хангах мэдээллийн баазтай болохоороо ихээхэн давуу талтай.
Орхон аймгийн хувьд энэ жил 5800 га талбайд тариалалт хийнэ. Газар тариалангийн 40 орчим хувь нь Булган, Сэлэнгэ аймагт бий. Тэгвэл өөр аймгуудад газар тариалан эрхэлж буй иргэн, аж ахуйн нэгжүүдийг түүврийн аргаар сонгож тариалангийн талбай дээр тоологч нар биечлэн очин талбайн цэгийг хэмжих аж.
Тиймээс иргэн, аж ахуйн нэгж байгууллагуудыг “Хөдөө аж ахуйн тооллого 2022”-т идэвхтэй хамрагдаж, мэдээллээ үнэн зөвөөр өгөхийг уриалж байна.

Мэдээллийн төв