“Хөдөө аж ахуйн тооллого 2022”-ын тоологч, шалгагч, сум, аймгийн комиссын гишүүдэд зориулсан сургалт эхэллээ

Статистикийн тухай хуулийн 7 дугаар зүйлийн 1 дэх заалтад Хөдөө аж ахуйн ээлжит тооллогыг 10 жил тутам зохион байгуулахаар хуульчилсан. Уг хуулийг хэрэгжүүлэх үүднээс Монгол Улс Хөдөө аж ахуйн анхдугаар тооллогыг 2012 онд зохион байгуулсан.
Засгийн газрын 2022 оны 74 дүгээр тогтоолоор Хөдөө аж ахуйн ээлжит тооллого явуулах товыг тогтоосноор Үндэсний статистикийн хорооноос уг тооллогыг улсын хэмжээнд 5-7 сард зохион байгуулах гэж байна. Энэ удаагийн хөдөө аж ахуйн улсын тооллого энэ сарын 21-нээс Орхон, Булган аймгаас эхлэх юм. Үүнтэй холбоотойгоор “Хөдөө аж ахуйн тооллого 2022”-ын тоологч, шалгагч нарыг бэлтгэх хоёр өдрийн сургалт өнөөдөр эхэллээ.
Сургалтад Засаг даргын орлогч, тооллогын комиссын дарга А.Түвшинжаргал, аймгийн Засаг даргын дэргэдэх Статистикийн хэлтсийн дарга Б.Туул болон тоологч, шалгагч, сум, аймгийн тооллогын комиссын гишүүд 27 хүн оролцож байна.

Энэ удаагийн тооллогоор...

хөдөө аж ахуйн салбарын мэдээллийг өрх, аж ахуйн нэгж, байгууллага бүрээр дэлгэрэнгүй бүртгэж, ажиллах хүчний дэлгэрэнгүй судалгаа гаргах,
мал аж ахуйн болон газар тариалангийн машин тоног төхөөрөмж, барига байгууламжийн мэдээлэл,
газар ашиглалт, хөрсний доройтол,
ургацын хорогдол, бордоо, ургамал хамгааллын бодисын хэрэглээ,
хөдөө аж ахуйн бүтээгдэхүүний зардал
хүнсний хангамж, аюулгүй байдлын асуудлаар дэлгэрэнгүй статистик мэдээллийн үндсэн эх үүсвэртэй болох юм.

Арван жилд нэг удаа энэхүү тооллогыг явуулснаар....

Олон улсын төвшинд харьцуулагдахуйц мэдээллийг цуглуулах,
тогтвортой хөгжлийн шалгуур үзүүлэлтүүдийг тооцох,
хүнсний аюулгүй байдлын тооцооны мэдээлэл бүрдүүлэх,
газар зүйн мэдээллийн сан боловсруулах зэрэг ач холбогдолтой.

Хоёр өдрийн сургалтыг Үндэсний статистикийн ЭЗСГ-ын ХААБОҮСХ-ийн ахлах статистикч Б.Уянгаа удирдан явуулж байгаа бөгөөд тэрээр “Энэ удаагийн тооллогыг 4 үндсэн зорилгын хүрээнд зохион байгуулахаар бэлтгэж байна. Тухайлбал, өмнөх 10 жилд явуулсан тооллогоос хойш хөдөө аж ахуйн салбарт гарсан өөрчлөлтүүд нь юу байна вэ, урт хугацааны бодлогын баримт бичгүүд, уур амьсгалын өөрчлөлт дэлхийн дулаарал хүлэмжийн хийн тооллогод шаардлагатай мэдээллийг цуглуулна. Мөн сансарын зураг ашиглан нэг га-аас авах ургацын хэмжээг тодорхойлох аргачлалыг боловсруулах юм. Энэ удаагийн тооллогод таблет ашиглаж байгаа нь илүү онцлогтой болж байна” гэлээ.
Энэ сарын 21-ний өдрээс эхлэн Баян-Өндөр сум 4, Жаргалант сумыг 5 тоологч хариуцан 14 хоногийн хугацаанд “Хөдөө аж ахуйн тооллого-2022”-ыг хийж гүйцэтгэх юм. Тиймээс малчин, тариаланч иргэдийг тооллогодоо идэвхтэй хамрагдаж мэдээллээ үнэн зөвөөр өгөхийг уриалж байна.

Мэдээллийн төв