Орхон аймаг боловсролын салбартаа 40 гаруй тэрбум төгрөгийн хөрөнгө оруулалт хийжээ

Орхон аймаг боловсролын салбартаа сүүлийн гурван жилийн хугацаанд 40 гаруй тэрбум төгрөгийн хөрөнгө оруулалт хийжээ. Тодруулбал: 2020-2023 оны хооронд гурван шинэ цэцэрлэг, гурван цэцэрлэгийн өргөтгөл, нэг сургуулийн барилга улс болон орон нутгийн төсвийн хөрөнгөөр ашиглалтад оруулж хүртээмжийг нэмэгдүүллээ. Мөн өнөөдрийн байдлаар улсын төсвийн хөрөнгө оруулалтаар баригдаж буй дөрвөн сургуулийн барилгын ажил үргэлжилж байна.
Түүнчлэн тоног төхөөрөмжийн сайжруулалт шинэчлэлт, засвар үйлчилгээг тогтмол хийж сургалтын хэрэглэгдэхүүн, суралцах орчин нөхцлийн сайжруулсаар байна. Өнгөрсөн 2023 онд төрийн өмчийн 17 сургуулийн нийт сурагчдын 92 хувийг стандартад нийцсэн шинэ ширээ сандлаар хангав. Спортын төрөлжсөн сургалттай “Ирээдүйн одод” сургуулийн өргөтгөл, урлагийн төрөлжсөн сургалттай "Уран эгшиг" сургуулийг ашиглалтад оруулж засвар шинэчлэлийг хийлээ.
Аймгийн Засаг даргын Тамгын газар, БШУГ-тай хамтран орон нутагтаа багшийн хөгжлийг дэмжих “Багш” хөтөлбөр, хүүхэд залуучуудын эх хэлний боловсролыг нэмэгдүүлэх зорилгоор “Эх хэл Эрдэнэт” хөтөлбөрийг хэрэгжүүлсээр байна. Хөгжлийн бэрхшээлтэй хүүхдийг боловсролд тэгш хамруулах “тэгш боломж” төсөл, “эрүүл хүүхэд”, хүүхдийн хөгжил зэрэг орон нутгийн онцлогт нийцсэн шинэ, шинэлэг төсөл хөтөлбөрүүдийг хэрэгжүүлж байгаа юм.

Мэдээллийн төв