Аюулгүйн нөөцөд нэмэлтээр бэлтгэсэн өвс, тэжээлийг энэ сарын 25-наас малчдад олгоно

Мал аж ахуйн хаваржилт хүндэрсэнтэй холбоотойгоор аймгийн Онцгой комиссоос шат дараатай арга хэмжээг авч хэрэгжүүлж буй. Аймгийн Засаг даргын 2024 оны А/130, А/146 дугаар захирамжийн хүрээнд аймгийн өвс, тэжээлийн аюулгүйн нөөцөд нэмэлтээр 2000 боодол буюу 40 тн өвс, 7142 шуудай буюу 178.5 тн тэжээл, 600 кг био бэлдмэл, 1670 ширхэг долооцыг нөөцөд бэлтгэсэн.

Мал төллөлт, төл бойжилтод зориулан бэлтгэсэн өвс, тэжээлийг малчдад үнэгүй олгох асуудлыг өнөөдөр аймгийн Онцгой комиссын хуралдаанаар хэлэлцэж, энэ сарын 25-наас олгохоор шийдвэрлэлээ. Ингэхдээ Баян-Өндөр суманд 1000 шуудай тэжээл, 300 ширхэг ашигт долооц, 150 кг био бэлдмэл, Жаргалант суманд 1000 боодол өвс, 4642 шуудай тэжээл, 700 ширхэг ашигт долооц, 450 кг био бэлдмэл, ХХААГ-т 1000 боодол өвс, 1500 шуудай тэжээл, 670 ашигт долооцыг тус тус олгохоор шийдвэрлэв.

Мөн улсын онцгой комиссын 2024 оны 03 дугаар хуралдааны шийдвэрийн дагуу улсын нөөцөөс Орхон аймагт 200 шуудай гурил, 200 шуудай будааг хуваарилсан. Үүнийг улсын Онцгой комиссоос өгсөн чиглэлийн дагуу өндөр настан, хөгжлийн бэрхшээлтэй иргэн, ам бүл олох өрх, малын зүй бус хоргодол ихтэй малчин өрх зэргийг үндэслэн олгох юм. Энэ хүрээнд Жаргалант сумын 307 өрхөд, Баян-Өндөр сумын 93 өрхөд олгохоор тус тус шийдвэрлэлээ.

Түүнчлэн хуралдаанаар Баян-Өндөр, Жаргалант сумдын 11 чиглэлд мал аж ахуйн хаваржилт, цаг үеийн байдалтай танилцах, Малчдад туслая аяны хүрээнд цугласан хандив, Эрүүл мэндийн багцыг хүргэх, хүн, мал эмнэлгийн үйлчилгээг үзүүлэх зорилгоор энэ сарын 12-15 ны өдрүүдэд ажилласан тайлан мэдээг сонслоо.
Ажлын хэсэг эрүүл мэндийн үйлчилгээг 368 малчин өрхийн 298 иргэнд анхан шатны тусламж үйлчилгээ үзүүлж, эмийн багц, хандивын хүрээнд цугласан тусламжийг олгосон гэж мэдээллээ.

Мэдээллийн төв