Орхон аймаг, Эрдэнэт хот дотоодын аялал жуулчлалыг хөгжүүлж, уул уурхайн салбараа сурталчлах  зорилгоор 3 дахь жилдээ “Зэс фестиваль” арга хэмжээг энэ сарын 18,19,20-нд  өд зохион байгуулах гэж  байна. 
Монгол Улсын Засгийн газраас аялал жуулчлалын салбарыг эдийн засгийн тэргүүлэх эгнээнд авч үзэн 2023-2025 оныг “Монголд зочлох жил”-ээр зарласан.  Энэ хүрээнд Орхон аймаг  орон нутгийн төдийгүй, Монгол Улсын нэрийн хуудас болох арга хэмжээг “Зэс фестиваль” гэж үзэж буй. 
Энэхүү үйл ажиллагаагаар Зэс боловсруулах үйлдвэрүүдээс гадна зэсээр эцсийн бүтээгдэхүүн үйлдвэрлэдэг иргэн, аж ахуйн нэгж байгууллагын бүтээгдэхүүнийг иргэд олон нийтэд сурталчилж, танилцуулдаг уламжлалтай.  

Орхон аймагт 5000 гаруй аж ахуйн нэгж үйл ажиллагаа явуулж байгаагаас  уул уурхайн чиглэлээр үйл ажиллагаа явуулдаг таван аж ахуйн нэгж бий. Тухайлбал, “Эрдэнэт үйлдвэр” ТӨҮГ, “Ачит Ихт” ХХК, “Гал сэнтий” ХХК, “Эрдмин”  зэрэг компаниуд бүтээгдэхүүн, үйл ажиллагаагаа иргэд олон нийтэд уламжлал ёсоор танилцуулах юм. 
Мөн есдүгээр сарын 18,19-нд   дээрх уул уурхайн үйлдвэрүүдтэй танилцах аяллыг зохион байгуулна.   А.Амарын талбайгаас  10:00 цагт үнэ төлбөргүй автобус иргэдэд үйлчлэх тул сонирхсон хүн бүхэнд нээлттэй. 

Энэ жилийн Зэс фестивалийн нэг онцлог нь анх удаа гадаа дэлгэцээр Эрдэнэтийн хүүхэд залуучуудад кино үзүүлнэ. Есдүгээр сарын 19-нд “Эрдэнэт цэнгэлдэх” хүрээлэнд 20:00 цагаас “Ин да Хаус 3” уран сайхны кинонд Эрдэнэтчүүдийг урьж байна. 

 

Мөн есдүгээр сарын 19,20-нд “Ачит Ихт” ХХК-иас Эрдэнэт цэнгэлдэх хүрээлэнд 10:00-20:00 цагийн хооронд Counter strike тэмцээнийг зохион байгуулна.  Тус тэмцээнд ЕБС тус бүрээс 12 дугаар ангийн сурагчдаас бүрдсэн нэг баг, их дээд сургууль тус бүрээс хоёр баг тус тус оролцоно. 

Түүнчлэн есдүгээр сарын 20-нд “Эрдэнэт үйлдвэр”  ТӨҮГ-аас 10:00-13:00 цагийн хооронд Open mic арга хэмжээг зохион байгуулах бол Монгол зэсээр урласан бүтээгдэхүүний үзэсгэлэн худалдаа 19,20-ны өдрүүдэд Эрдэнэт цэнгэлдэх хүрээлэнд гарна. Энэ үеэр хоол, худалдаа, үйлчилгээ  гарах тул иргэд  олон үндэстний хоолыг амтлах боломжтой. 
Мөн энэ жилийн Зэс фэстивалиар гавьяатуудын тоглолтыг Эрдэнэтчүүдэд толилуулна. Есдүгээр сарын 20-ны 17:00-20:00 цагт МУАЖ С.Батсүх, МУГЖ У.Далантай, Б.Батболд, С.Ганзориг, Танхай ерөөлч Сүхээ нарын тоглолт болох бол 20:20-24:00 цагт NENE,Toonot/OZ, ThunderZ, Jason, Rookie, Runaa/MC collection/, DJ set, BIG GEE зэрэг уран бүтээлчдийн оройн шоу арга хэмжээтэй.  

Улаанбаатар хотоос “Leaf center” ХХК-иас цахилгаан автомашинаа  танилцуулж, “Зэс фестиваль”-д энэ жил дахин оролцоно. Цахилгаан автомашиныг  бүтээхэд зэс 80 хувийг бүрдүүлдэг. Түүнчлэн багуудын Соёлын төвүүдэд урлаг соёлын олон талт арга хэмжээг зохион байгуулахаар төлөвлөжээ.  Баянцагаан багийн соёлын төвд Тата тунга, Зэс урлан дуудлага худалдаа, Хэмнэл соёлын төвд урлагийн тоглолт, нийтийн бүжиг, Аялгуу соёлын төвд VR музей, Эгшиглэн соёлын төвд “Зэсээр урлая” бүтээлч уралдаан тус тус болно. 

Мэдээллийн төв