Нээлттэй засгийн түншлэлийн долоо хоног-2025 арга хэмжээг орон даяар зохион байгуулна
Монгол Улсын Загсийн газраас “Нээлттэй засгийн түншлэлийн долоо хоног 2025” арга хэмжээг энэ сарын 19-23-ны өдрүүдэд улсын хэмжээнд зохион байгуулах гэж байна.
Дэлхийн 77 улсын нэгдсэн Нээлттэй засгийн түншлэлд Монгол Улс нэгдээд 12 жил болж буй. Үүнээс хойш олон улсад өгсөн үүрэг, амлалтыг хэрэгжүүлж, гишүүн улсын хувьд Нээлттэй засгийн түншлэлийн үнэт зүйлсийг бэхжүүлэх чиглэлээр хамтын ажиллагааг өргөжүүлэх, ялангуяа ил тод, нээлттэй байдал, ардчилсан ёс, шударга ёс, иргэний орон зайн асуудлаар хамтран ажиллах боломж бололцоог эрэлхийлж иржээ.
2025 оны Нээлттэй засгийн түншлэлийн долоо хоногийн зорилго нь Нээлттэй засгийн түншлэлийн үнэт зүйлсийг бэхжүүлэхэд хамтын ажиллагааг өргөжүүлэх, хариуцлагатай бизнесийн үйл ажиллагааг түгээн дэлгэрүүлэх, “И-Бизнес” бизнес эрхлэгчдэд зориулсан платформыг таниулах юм.
Энэ хүрээнд долоо хоногийн турш нээлттэй засгийн түншлэлийг таниулан сурталчлах, нээлттэй засгийн түншлэлийн 10 үнэт зүйлийн хүрээнд өдөрлөг зохион байгуулах, Нээлттэй засгийн сорилт: Улс төрийн намын санхүүжилтийн ил тод байдал арга хэмжээг зохион байгуулна.
Нээлттэй засгийн түншлэл нь иргэдэд илүү хүртээмжтэй, хариуцлагатай, хариу үйлчилгээ сайтай засаглалыг бэхжүүлэхийг зорьж олон нийт болон Засгийн газар хоорондын харилцаа урт хугацаандаа сайжрах, цаашлаад хүн бүрд үр өгөөжтэй нийгмийг цогцлооно гэсэн үзэл санаанд суурилдаг.
Монгол Улс Нээлттэй засгийн түншлэлд нэгдсэнээс хойш Үндэсний үйл ажиллагааны төлөвлөгөөг дөрвөн удаа хэрэгжүүлсэн бөгөөд 2024-2027 оны үйл ажиллагааны Үндэсний V төлөвлөгөөний төслийг боловсруулж, дараах есөн зорилтыг дэвшүүлсэн байна. Үүнд:
1. Олборлох үйлдвэрлэлийн ил тод байдлыг сайжруулах;
2. Мэдээллийн ил тод байдлын эрх зүйн орчныг боловсронгуй болгох замаар төрөөс мэдээлэл авах иргэдийн эрхийг баталгаатай хангаж, төрийн ил тод байдлыг сайжруулах;
3. Иргэний нийгмийн орон зай, төлөвшил, эвлэлдэн нэгдэх эрхийг дэмжиж, хараат бусаар, бие даан, өөрийгөө удирдан явуулах боломжийг бүрдүүлсэн эрх зүйн орчныг боловсронгуй болгох;
4. Ардчилсан ёсыг бэхжүүлэх зорилгоор хэвлэл мэдээллийн эрх чөлөөг баталгаажуулах;
5. Улсын төсөв, төсвийн хөрөнгө оруулалтад иргэдийн оролцоо, хяналтыг нэмэгдүүлэх;
6. Нийгмийн бүх бүлэгт төрөөс үзүүлэх үйлчилгээг оновчтой болгох;
7. Ардчилсан нийгэмд нээлттэй өгөгдлийн соёл цогцлоох;
8. Төрийн байгууллагын үйл ажиллагааг иргэдийн сэтгэл ханамжаар тогтмол дүгнэж, оролцоог нэмэгдүүлэх;
9. Төрийн захиргааны байгууллагын үйл ажиллагааны нээлттэй байдлыг нэмэгдүүлэх зэрэг зорилтыг дэвшүүлсэн аж.
Мэдээллийн төв
