Наро Банчэн гэгээнтэн Бурхан багшийн сэргээн бүтээсэн дүрд аравнай өргөнө
Наро Банчэн гэгээнтэн маргааш буюу энэ сарын 6-нд Орхон аймагт морилж, Бурхан багшийн сэргээн бүтээсэн дүрд аравнай өргөнө. Ёслолын үйл ажиллагаа 11:00-13:00 цагийн хооронд Их шүтээн цогцолборт болох тул сүсэгтэн олон Та бүхнийг буян номын үйл ажиллагаанд өргөнөөр оролцохыг урьж байна.
Эрдэнэт хот байгуулагдсаны 50 жилийн ойн хүрээнд Бурхан багшийн сэрэг дүр буюу Их Шүтээн цогцолборыг сэргээн засварлаж, өнгө үзэмжийг шинэчлэн тохижуулсан билээ.
Зураг төслийг "Эрдэнэт үйлдвэр" ТӨҮГ-ын Зураг төслийн хүрээлэн зуржээ. Энэхүү ажлын хүрээнд цогцолборын гадна, дотор засвар, сэрэг дүрийн өнгөлгөө, орчны тохижилт, ногоон байгууламж болон авто замын шинэчилсэн бөгөөд гүйцэтгэгчээр “Бодь Хангай” ХХК ажиллажээ.
Тодруулбал, цогцолборын суурийн хэсгийг усан дээр дэлгэрэх бадамлянхуа цэцгийн дүрслэлээр чимэглэсэн байна. Буддын шашинд бадамлянхуа нь булингарт уснаас урган гарсан ч хиргүй, ариун дэлбээгээр дэлгэрдэг онцлогоороо цэвэр ариуны бэлгэддэг билээ. Мөн зулын бадмыг бэлгэдсэн алтлаг суурьтай гэрэлтүүлгийг шийдэл болгожээ.
Их Шүтээн цогцолборыг Эрдэнэт хот байгуулагдсаны 35 жилийн ой, Монгол Улсад Үндэсний эрх чөлөөний хувьсгалын 100 жилийн ойд зориулан ард иргэдийн хандив, дэмжлэгээр бүтээн байгуулж, 2011 онд ашиглалтад оруулсан.
Мэдээллийн төв
