Европын сэргээн босголт хөгжлийн банкны Монгол дахь  Суурин төлөөлөгч Ханнес Такач, ЖДБ-ийн санхүүжилт, хөгжлийн газрын Төв Ази, Монгол Улсын бүсийг хариуцсан захирал Симоне Зэх Атанасовки болон Жижиг, дунд бизнесийн зөвлөх үйлчилгээ хариуцсан шинжээч, мэргэжилтнүүд өнөөдөр манай аймагт ажиллаж байна. 

Аймгийн Засаг дарга Б.Зоригтбаяр, ЗДТГ-ын Хамтын ажиллагаа гадаад, дотоодын төсөл хөтөлбөр хариуцсан удирдагч Б.Оюун-Эрдэнэ бусад холбогдох албаныхны хамтаар хүлээн авч уулзан, хамтран хэрэгжүүлэх үйл ажиллагааны  талаар санал солилцлоо. 

Ноён Ханнес Такач  тавдугаар сарын 29-нд “Эрдэнэт хотын гамшигт тэсвэртэй байдал” төслийг эхлүүлэхээр манай аймагт ирж байв.  Энэ үеэр аймгийн удирдлагуудтай Европын сэргээн босголт хөгжлийн банк, Орхон аймаг илүү өргөн хүрээнд   хэрхэн хамтарч ажиллах боломжийн талаар санал солилцсон. Ялангуяа, банкны зүгээс орон нутгийн жижиг дунд, бизнес эрхлэгчдийн бизнесийн үйл ажиллагаанд дэмжлэг үзүүлэх, зөвлөн туслах боломжийн талаар хэлэлцэж, ойрын хугацаанд ажил хэргийн уулзалт, арга хэмжээг зохион байгуулахаар тохиролцсон. 

Уулзалтын эхний яриа уг агуулгын хүрээнд өрнөж, харилцан яриа өрнүүлэв. 

Өнөөдөр тэрээр, энэ чиглэлийн албаны хүмүүсийн хамтаар манай аймагт ажиллаж, орон нутгийн 30 гаруй жижиг, дунд бизнес эрхлэгчидтэй уулзалт хийн ЕСБХБ-ны Жижиг,  дунд бизнесийг дэмжих хөтөлбөрийг танилцуулахын зэрэгцээ бизнесийн зөвлөх үйлчилгээ, санхүүгийн боломж, ногоон зээлийн талаар мэдээлэл солилцох арга хэмжээг ХААН банктай хамтран  зохион байгуулж байна. 

Орон нутгийн жижиг, дунд бизнес эрхлэгч, ААН-үүдэд хамгийн хэрэгцээтэй зүйл нь олон улсын зээл,  төсөл хөтөлбөрт хэрхэн  хамрагдах, ялангуяа бага хүүтэй, ногоон зээл, санхүүжилтийн талаарх мэдлэг мэдээлэл байдаг. Энэ талын бүх мэдээллийг ЕСБХБ-ны холбогдох албаныхан  орон нутагт ирж өгч буйд аймгийн Засаг дарга Б.Зоригтбаяр талархал илэрхийлсэн. 

ЕСБХБ нь Монгол Улсад идэвхтэй үйл ажиллагаа явуулж байгаа олон улсын байгууллага. Үйл ажиллагааны үндсэн чиглэл нь бодлогын дэмжлэг үзүүлэх, жижиг дунд бизнес эрхлэгчдэд зөвлөх үйлчилгээ үзүүлэх, дэд бүтэц болон хувийн салбарт хөрөнгө оруулалт хийдэг. Монгол Улсад үйл ажиллагаа явуулж эхэлснээс хойш 1,2 тэрбум ам.долларын хөрөнгө оруулалт хийсэн байна.   2001 оноос 1000 гаруй ААНБ-д бизнесийн зөвлөх үйлчилгээний дэмжлэг үзүүлсний үр дүнд 6500 гаруй ажлын байр хадгалагдаж, тус банкнаас үйлчилгээ авсан бизнес эрхлэгчдийн борлуулалтын орлого 70 хувиар өссөн гэх мэдээллийг өглөө. 

Уулзалтын хоёр дахь хэсэг аймаг, орон нутагт тулгамдаад буй асуудлыг шийдвэрлэх хамтын ажилагааны талаар үргэлжлэв. 

Засаг дарга Б.Зоригтбаяр инженерийн шугам сүлжээний шинэчлэлийн өнөөгийн нөхцөл байдал шийдвэрлэх үндэслэл, шаардлагатай хөрөнгө оруулалтын талаар танилцуулга хийлээ. 

Аймгийн инженерийн дэд бүтцэд тулгамдаж буй гол асуудал бол шугам сүлжээний насжилт, хуучралт юм. Аймгийн хэмжээнд ашиглагдаж байгаа  цэвэр усны шугамны нийт урт 119.5 км үүний 75.08 км буюу 64 хувь нь эдэлгээний хугацаа дууссан байна.  Ариутгах татуургын шугам 89.7 км үүний 55.6 км буюу 62 хувь нь хуучирсан, дулаан хангамжийн шугам 80.7 км урттай, 33.08 км буюу 40.9 хувь нь эдэлгээний хугацаа хэтэрсэн.  

Үүнээс улбаатай хүйтний улиралд, ялангуяа өвлийн оргил ачааллын үед шугамын доголдол, гэмтэл, аваар гарах, саатлын тоо эрс нэмэгдэж, иргэдийн халаалт, цэвэр усны хангамж тасалдах болсон гэхчлэн бодит нөхцөл байдлаа танилцуулав. 

Мөн “Эрдэнэт бонд”, үүний хүрээнд хэрэгжүүлэхээр төлөвлөж буй төсөл арга хэмжээнийхээ талаар мэдээлэл өгсөн. 
Суурин төлөөлөгч Ханнес Такач  ЕСБХБ-ны зүгээс Орхон аймаг, Эрдэнэт хотыг байгальд ээлтэй, ухаалаг, ногоон хот болох зорилтыг дэмжиж,  цэвэр усны хангамж, ариутгах татуургын шугам сүлжээний шинэчлэл, эрүүл мэнд, боловсролын салбарын хөрөнгө оруулалт, бүтээн байгуулалтыг дэмжиж ажиллахаа илэрхийллээ. 

Мэдээллийн төв