Аймгийн ИТХ-ын ээлжит наймдугаар хуралдаанаар Орхон аймгийн хөгжлийн 2027 оны төлөвлөгөөг хэлэлцэж,   төслөөр нь баталлаа. Хэлэлцэж буй асуудалтай холбоотой илтгэлийг аймгийн Засаг дарга Б.Зоригтбаяр танилцуулав.  Хөгжлийн жилийн төлөвлөгөөг боловсруулахдаа Монгол Улсын урт болон дунд хугацааны бодлогын баримт бичиг,  Орхон аймгийг 2026-2030 онд хөгжүүлэх таван жилийн үндсэн чиглэл”, “Засаг даргын 2024-2028 оны үйл ажиллагааны хөтөлбөр”, “Монгол Улсын хөгжлийн 2027 оны төлөвлөгөө”-нд  нийцүүлжээ. 
Хэлэлцэж буй асуудалтай холбогдуулан  Орхон аймгийн хөгжлийн 2026 оны төлөвлөгөөний талаар товч танилцуулахад,  188 арга хэмжээг тусгаснаас  эхний хагас жилийн хэрэгжилт 69.4 хувьтай байна. 
Тухайлбал, 

• 74  арга хэмжээ 100 хувьтай, 
•  9 арга хэмжээ 99-85 хувьтай буюу “үр дүнтэй”
•  21 арга хэмжээ 84-60 хувьтай буюу “үр дүн хүлээгдэж байгаа”,
•   21 арга хэмжээ 59-30 хувьтай буюу “үр дүн хангалтгүй”,
•  30 арга хэмжээ 29-0 хувьтай буюу “үр дүн гаргаагүй” гэж  үнэлэгдсэн. Мөн хэрэгжих хугацаа хүлээгдэж байгаа 33 арга хэмжээ байна.

Эерэг үр дүнгээ нэмэгдүүлж, сөрөг үр дүнг бууруулна  

2025 онд дотоодын нийт бүтээгдэхүүн 15.3 хувиар өсөж, эдийн засгийн салбарын хувьд аж үйлдвэр, худалдаа, үйлчилгээ, барилга, нийтийн аж ахуй, тээврийн салбарын бүтээгдэхүүн үйлдвэрлэлт, орлогын хэмжээ нэмэгдэж, татварын орлого 11.4 хувиар өссөн зэрэг эерэг үр дүн гарсан. 
 Мөн нийгмийн салбарын хувьд өрхийн тоо нэмэгдсэн, хүн амын дундаж насжилт 73.93 жил болж өссөн, гэр бүл цуцлалт 16, нас баралт 2.5 хувиар буурсан, спортын уралдаан тэмцээнээс хүртсэн медаль 92-оор нэмэгдсэн зэрэг эерэг үр дүнгүүд гарсан байна. 
Гэвч хүн амын тоо буурсан, гэмт хэргийн гаралт өссөн, малын тоо буурсан, халдварт өвчнөөр өвчлөгчид өссөн, ажилгүйдлийн түвшин өссөн зэрэг сөрөг үр дүнгүүд гарсан талаар танилцуулав.  Тиймээс 2027 хөгжлийн жилийн төлөвлөгөөнд үндсэн чиглэлд туссан зорилтуудаа хангах, нийгэм, эдийн засгийн салбарт гарч буй дээрх эерэг үр дүнг улам нэмэгдүүлэх, сөрөг үр дүнгүүдийг бууруулахад чиглэсэн үр дүнд суурилсан төлөвлөгөөг боловсруулжээ. 

2027 онд 2100 иргэнийг ажлын  байранд зуучилна 

Хөгжлийн 2027 оны төлөвлөгөөний төсөлд аймгийн үндсэн чиглэлд туссан 8 бүлгийн хүрээнд үндэсний 10, салбарын 27, Төсвийн ерөнхийлөн захирагчийн 63, хөтөлбөрийн түвшний 139 үр дүнг хангахад чиглэсэн 257 арга хэмжээг хэрэгжүүлэхээр төлөвлөсөн. Тухайлбал, “Хүний хөгжил” бүлгийн хувьд боловсрол, эрүүл мэнд, спорт, хөдөлмөр эрхлэлтийн салбарын хүрээнд 45 арга хэмжээг хэрэгжүүлэн Хүний хөгжлийн индексийг 0.835-д хүргэх, 10000 хүнд ногдох зонхилон тохиолдох өвчлөлийг 0.1 продецмилиар бууруулах, хүн амын бие бялдрын түвшинг 55-аас 56.5 хувьд хүргэх, ажиллах оролцооны түвшинг 52 хувьд хүргэх зэрэг үр дүнг гаргана гэжээ. 

2026 оны эхний 9 сарын байдлаар 1551 иргэнийг ажлын байранд зуучилснаас 648 нь шинэ ажлын байр байна.  2027 онд нийт 2,100 иргэнийг ажлын байранд зуучлахаар төлөвлөснөөс 1,100 иргэнийг шинэ ажлын байранд зуучилна. Мөн 2030 он хүртэлх хугацаанд хөдөлмөрийн зах зээлийн судалгаа, тооцооллыг хийсэн бөгөөд үйлдвэр дагасан мега төслүүд ашиглалтад орсноор  1,700 орчим шинэ ажлын байр бий болно гэх тооцоолол бий. Иймд хөдөлмөрийн зах зээлийн эрэлт, нийлүүлэлтийг уялдуулах, иргэдийг шинээр бий болох ажлын байрны шаардлагад нийцүүлэн мэргэшүүлэх, ур чадвар эзэмшүүлэх, ажлын байранд зуучлах арга хэмжээг үе шаттай хэрэгжүүлнэ. 

Нэг хүнд ногдох ДНБ-ийг 40 сая төгрөгт хүргэх зорилт дэвшүүллээ 

Эдийн засаг, дэд бүтэц бүлгийн хувьд Үйлдвэрлэл, хөдөө аж ахуй, аялал жуулчлал, санхүү, эрчим хүч, авто замын салбарын 36 арга хэмжээг хэрэгжүүлнэ. Үр дүнд нэг хүнд ногдох дотоодын нийт бүтээгдэхүүнийг 40 сая төгрөгт хүргэх, хөдөө аж ахуйн салбарын ДНБ-ыг 6.3 хувиар өсгөх, хүлээн авсан жуулчдын тоог 5 хувиар нэмэгдүүлэх, төвлөрсөн дулаан хангамжийн суурилагдсан чадварыг 177.2 гкал-д хүргэнэ.  
Бүсийн хөгжил бүлгийн хувьд сургууль, цэцэрлэгийн ачааллыг бууруулах, нийтийн тээврийн үйлчилгээг сайжруулах, хот төлөвлөлтийг сайжруулахад чиглэсэн 14 арга хэмжээг хэрэгжүүлнэ. Үр дүнд орон нутгийн хөгжлийн индексийг 0.618 болгож нэмэгдүүлэх, төсвийн орлогыг 9.5 хувиар нэмэгдүүлэх зэрэг үр дүн гаргахаар төлөвлөжээ. 

Мэдээллийн төв